Fossvogsblettur - nýr leikskóli

Leikskólabyggingin er á einni hæð með flötu þaki og stendur austast á lóðinni. U-laga form hennar myndar eins konar faðm til vesturs þar sem skjólgott og rólegt útisvæði myndar aðkomutorg leikskólans. Sorp- og hjólageymslur eru í sérbyggingum.

Skólinn mun hýsa 10 leiskóladeildir sem dreifast í þrjá húshluta. Hver deild samanstendur af heimastofu, tveimur hóprýmum og snyrtingu. Deildirnar sameinast um matstofur og opin rými.

Yngstu börnin eru í suðurhluta byggingarinnar þar sem eru fjórar deildir. Miðstig skólans verður í austurhlutanum þar sem eru þrjár deildir og elstu börnin verða í norðvesturhluta byggingarinnar þar sem eru þrjár deildir. Í norðurhluta byggingarinnar, á milli deilda mið- og efsta stigs, eru fjölnotasalur, bókasafn/opið rými, listasmiðja, eldhús skólans ásamt aðstöðu starfsfólks.

Sérstakur inngangur er við hvern húshluta leikskóladeildanna í góðum tengslum við fataherbergi nemenda sem svo tengjast beint við matstofur/opin rými deildanna.
Inngangur starfsfólks er að norðanverðu og tengist beint við aðstöðu starfsfólks. Inngangur í eldhús leikskólans er einnig að norðanverðu. Inngangur fyrir gesti er að norðvestanverðu, í góðum tengslum við rými yfirstjórnar skólans.

Í grunninn er fyrirkomulag deildanna mjög líkt að undanskildum snyrtingum þeirra. Á deildum fyrir yngstu börnin sameinast tvær deildir um snyrtingu. Snyrtingarnar taka mið af aldurshópnum og þ.a.l. er gert ráð fyrir tveimur skiptiborðum, tveimur salernum og koppasvæði á hvorri snyrtingu. Á deildum fyrir eldri nemendur hefur hver deild sína snyrtingu þar sem gert er ráð fyrir tveimur salernum og möguleika á skiptiborði. Á öllum snyrtingum er gerð ráð fyrir nemendum í hjólastól. Einnig er gert ráð fyrir snyrtingum í tengslum við fataherbergi nemenda.

Gert er ráð fyrir að aðstaða starfsfólks geti rúmað allt að 60 manns samtímis. Í tengslum við aðstöðu þess eru þrjár snyrtingar, þar af ein með sturtu. Til viðbótar við þær er gert ráð fyrir einni snyrtingu fyrir starfsfólk í suðurhluta byggingarinnar. Allir starfsmenn fá munaskáp í aðstöðu starfsfólks. 

Eldhúsið er framleiðslueldhús þar sem hádegisverður er eldaður. Morgunverður og kaffihressingar verða jafnframt útbúnar á staðnum. Starfsfólk eldhússins hefur sérsnyrtingu ásamt skiptiaðstöðu við hlið eldhússins.

Byggingin verður Svansvottuð.